Drama Singkat Berbahasa Bali Dadi Caleg Partai Politik

Tema : Politik

    Tokoh:

1.     Tuqiuh       

2.     Made Wantek

3.     They Rai    

4.     Drs. I Nym. Sader M.Si.               

5.     Wayan Klemod                                      

 

(Ring Saniscara Umanis rahina wengi, Drs. I Nym. Sader marembug sareng ipahnyane I Made Wantek. Ipun ngerembugang indik politik.)

I Nym. Sader           : “De, De Wantek, pemilune jani suba paek, dija men buin beli ngalih suara jani? Telah suba banjare bakat celepin nanging tusing masih cukup pang beli ngidang menek dadi anggota DPR.”

Made Wantek          : “Kene Bli, jani mula liu ada partai baru, keto masih iraga patuh sukehne yening lakar ngalih suara.Di kecamatan Mengwi, mula saja telah suba banjare tagihin beli partisipasi, sakewala yening di kecamatan Abiansemal engken ne Bli?”

I Nym. Sader           : “Nah keto ba keneh beline, lan buin mani semeng majalan kemu ka Abiansemal. Jalan ditu di banjar-banjar raga buin ngalih partisipan.”

Made Wantek          : “Beneh Bli, sawireh masyarakatne liu sinah liu masih lakar maan partisipan.”

I Nym. Sader           : “Nah lamun keto, telpon malu timpal Madene ditu, apang buin mani timpal-timpale ditu pada teka.”

Made Wantek          : “Nah-nah, tiang lakar nelpon timpal tiange ne ditu jani.”

(Lantas I Made Wantek nelpon timpalnyane sane wenten ring Br.Tengah Desa Punggul.)

I Made Wantek        : “Halo Mod, dija ne?”

Wayan Klemod        : “Jumah De, ngumpul-ngumpul jak timpal-timpale. Engken tumben ne?”

Wantek                     : “Kene Mod, buin mani semengne tiang lakar kemu melali. Timpal-timpale ada jumah?”

Klemod                    : “Ada De, buin mani semengne STT dini lakar gotong royong, nak kal ngudiang ngalih timpal-timpal De?”

Wantek                     : “Lakar ajak mesuaka, mumpung ipahe dadi caleg, lakar ngidih partisipasi.”

Klemod                    : “Oh nah De, buin mani lakar kumpulang timpale dini.”

Wantek                     : “Nah keto ba Mod, ngidih tulung malu apang buin mani tusing ada halangan kene keto nyen.”

Klemod                    : “Oh nah-nah, santai gen De.”

(Benjang semengne, Nyoman Sader sareng Made Wantek sampun neked ring Br. Tengah Punggul, kedapetang truna-trunane irika sampun sami mekumpul ring bale banjar irika.)

They Rai                   : “Nak lakar ada apa ne Tu?”

Tuqiuh                      : “Dingeh-dingeh, orange ada caleg lakar masuaka mai.”

They Rai                   : “Caleg apa? Lakar ngisiang gumi? Yen sing ke ada Pemilu jeg sing suba ia lakar mai.”

Tuqiuh                      : “Nah dingehang dogen apa ya lakar pesu!”

They Rai                   : “Nah.”

Klemod                    : “Inggih para semeton sareng sami, titiang nunas galah ajebos. Puniki wenten semeton saking Mengwi pacang masuaka ring rahina semeng puniki. Majeng ring Bapak Nyoman Sader, galah jagi kaatur, durusang!”

Nyoman Sader         : “Pinih ajeng tiang matur suksma antuk galah sane katur ring tiang. Tiang matur suksma ping banget semeton sareng sami sampun kayun makumpul iriki. Titiang nenten ja panjang lebar malih, titiang nunas partisipasi ring semeton sareng sami ring pemilu legislatif sane jagi rauh ring bulan April 2014 puniki. Titiang pinaka calon legislatif saking partai Pohon Pole Poleng jagi nyarengin pemilihan legislatif punika, punapi sane prasida atur titiang dening tiang prasida dados anggota legislatif inggih punika pembenahan Pura Kahyangan Tiga lan Bale Banjar sane wenten ring desa adat Punggul puniki.

Wantek                     : “Sapunapi semeton sareng sami? Dening wenten pikobet indik rencana pembangunan punika, titiang taler nunas masukan-masukan ring Ida Dane sareng sami. Inggih durusang!”

Tuqiuh                      : “Inggih suksma majeng ring galah sane sane kaatur, titiang nenten ja nyatua panjang lebar malih. Sane pinih banget tunas titiang wantah raos Bapak i wawu mangda nenten dados sekedar janji sane dados karaosang kemanten nanging isine puyung, inggih wantah asapunika pinunas titiang.”

They Rai                   : “Sinampura titiang nyelag ajebos. Titiang nyarengin punapi raos nyaman tiange i wawu, sakadi ne sampun-sampun lintang, sane wenten wantah janji kemanten. Nenten kasarengin antuk bukti. Yening kaucap kapok, masyarakat iriki jakti kapok. Mangkin tunas titiang mangda Bapak prasida ngicenin sane kawastanin kepastian. Inggih wantah asapunika pikobet sane wenten ring manah tiange.”

Nyoman Sader         : “Inggih matur suksma. Indik pikobet-pikobet sane wenten iriki titiang nenten ja pacang ngumbar janji kemanten. Dening napi sane dados janji tiang punika nenten katur, Ida Dane sareng sami dados nunas langsung ring pondok tiang Br, Lebah Pangkung Mengwi. Proposalnyane taler kaatur.”

Wantek                     : “Sapunapi semeton sareng sami, siap memilih kami?”

Semeton sami           : “Inggih siap!’

(Gelisang cerita, pemilu sampun kalaksanayang. Drs I Nyoman Sader M.Si. terpilih lan dados anggota legislatif  ring kabupaten Badung. Nanging janji ipunne wantah janji kemanten, sawatara sampun 2 tiban nenten wenten realisasi ring desa adat Punggul. Semeton irika sampun pepes ngajuang proposal ring Bapak I Nyoman Sader, nanging nenten wenten kepastian.)

They Rai                   : “Beh kene buin unduke tepuk, jeg sing ada apa. Men engken ne Mod? Timpal wakene ento ngumbar janji dogen.”

Klemod                    : “Tiang masih tusing ngerti De, engken patutne jani. Suba ja raga ngajuang proposal, nanging nu masih kene.”

Tuqiuh                      : “Nah unjuk rasa gen ba, raga masih ngelah hak nuunang jabatan I Sader ento. Engken setuju?’

 They Rai                  : “Nah ento mara gagasan luung. Yening sing keto lakar sing ada apa. Raga nak setuju gen .”

Klemod                    : “ Yening keto pangidih timpal-timpal, jalan jani ka umahne I Nyoman Sader.

(Gelisang satua, semeton saking Punggul kemu ka umahne I Nyoman Sader. Nanging, ia sing ada krana ia suba masuk penjara ulian kena kasus korupsi. Jani, janji tetep dadi janji.)

“Gumi jani tusing ada  ane tegehan teken pipis”